樂瞳 (原名龔茜彤)第一份工就做無綫藝員，捱足十年得個桔，早前劈炮唔續約，高調發表離巢宣言：「呢十年我搵唔到錢！」離巢冇靠山，再加上去年被富二代男友狠撇，好彩有好姊妹楊秀惠照住！樂瞳為生活有意轉做美容KOL (意見領袖)，黐實楊秀惠幫手硬sell美容產品，明知自己五短身形所以地獄式做gym打泰拳做瑜珈，一於省靚副偈做生招牌。
扮靚瘦身博轉行
無約一身輕的 樂瞳 話自己離巢後好吃香，已經有電影和唱片公司接洽佢：「滿約後有接洽唔同嘅工作，有、微電影，遲啲又會去上海做騷。」更表示現階段努力健身跳舞keep fit，目標做打女，又想去外國修讀戲劇課程。 樂瞳 看似周身刀，可惜冇樣精，拍戲做打女應該好難達標，似乎靠天生童顏轉做美容事業就真嘅！
出道多年樂瞳都面圓圓周身肉，為做KOL她進行地獄式特訓，健身瑜伽泰拳再加跳舞，操弗多月漸見成績。
除咗sell產品，樂瞳仲去跟美容導師學飄眉，成功就要多練習，她會用人造皮不停試畫。
據知樂瞳同楊秀惠一向好像friend，佢見對方做美容生意咁掂，於是有樣學樣，之前合作拍劇已不時問楊秀惠取經，早前仲成日黐住一齊做直播sell美容同瘦身產品。樂瞳亦不停喺自己微博同fb親身試用唔同嘅產品，想吸納多啲粉絲學做KOL。做生招牌唔易，佢知道baby fat係佢嘅致命傷，所以搏命做運動瘦身，仲走去學飄眉，乜都試嚇冇壞喎！
楊秀惠與樂瞳不時孖住在網上直播硬sell美容產品，早前二人更即場試飲修身沖劑。
楊秀惠與樂瞳同病相憐，同樣入行逾十年但仍然徘徊三線，所以二人感情特別好，日前相約歎High Tea。
學生look深入民心
無論想照dup楊秀惠條路做美容KOL，抑或想釣金龜？樂瞳都仍需努力。回顧過去樂瞳學生造型同依家成熟打扮，你又鍾意邊一類多啲？
初出道的樂曈以學生妹形象深入民心，喺發光發熱。
即使剔除學生裝束,仍然有一陣重mk味。
